Медот е природен засладувач кој често се смета за супер-храна поради неговите антибактериски својства, витамини и минерали. Многу родители со нетрпение очекуваат да го вклучат во исхраната на своето дете, но кога е вистинското време за тоа?
Зошто не смее мед пред 1 година?
Иако медот е здрав за возрасни, тој не се препорачува за бебиња под 12 месеци. Причината е опасноста од детски ботулизам, ретка но сериозна болест предизвикана од бактеријата Clostridium botulinum. Оваа бактерија може да се најде во медот, а дигестивниот систем на бебето е сè уште недоволно развиен за да се справи со неа.
Кога и како да се воведе мед?
Според препораките на Светската здравствена организација (СЗО) и педијатрите медот може да се воведе по наполнети 12 месеци (1 година).
Најдобро е да се почне со мала количина, на пример половина лажичка, и да се следи дали ќе има алергиска реакција. Можете постепено да го вклучите медот во: домашни колачиња, топли чаеви (не врели!), јогурт или каша или пак намази на леб (во мала количина).
Каков мед да изберете?
Кога првпат му давате мед на вашето дете, внимавајте:
- Да биде природен, непастеризиран и без додаден шеќер.
- Локален мед од проверен производител е најдобар избор, бидејќи е помалку веројатно да содржи нечистотии.
- Избегнувајте мед со додатоци (лимон, ѓумбир и сл.) за деца до 2 години
Заклучок
Консултирајте се со педијатар пред воведување нови намирници, особено ако има историја на алергии во семејството.
Медот е вкусен и здрав додаток во исхраната на децата, но само по нивната прва роденденска свеќичка. Со внимателно воведување, може да стане омилен дел од нивните оброци.
