Подготовките за доаѓањето на бебето се исполнети со возбуда и љубов, а уредувањето на неговата соба е можеби најубавиот дел од тој процес.
Разговаравме со Јоана Ристова Павлов од Структурал Дизајн, која ни сподели неколку едноставни, но волшебни совети за тоа како да создадете топол, удобен и стилски простор за најмалиот член на семејството.
1. Почнете со неутрални бои
„Секогаш препорачувам неутрална основа – крем, сива, песочна или нежно беж. Тие бои создаваат мир и топлина,“ раскажува Јоана.
Врз таа основа лесно можете да додадете детали – дрвени играчки, плишани животинчиња или нежни декорации, кои ќе внесат шарм и мекост во просторот.
2. Функционалност пред сè
„Во првите месеци најважно е сè да ви биде на дофат,“ вели таа.
Користете убави сламени или ткаени корпи за организација на пелените, кремите и малите неопходни работи. Тие не само што изгледаат природно и топло во просторот, туку и помагаат собата да остане уредна и практична.
Со добро организиран агол за преповивање, секојдневната рутина станува полесна, а собата попријатна и хармонична.
3. Изберете природни материјали
„Дрво, лен, памук – тие материјали внесуваат топлина и чувство на природност,“ додава Јоана.
Со неколку декорации од природни материјали или висечка играчка над креветчето, ќе создадете просторија што „дише“ и делува смирувачки – токму тоа што му треба на секое бебе. Слатки и практични дрвени закачалки и полици на ѕидовите додаваат топлина и стил, а воедно заштедувате на простор.
4. Светлината прави разлика
“Мекото, топло светло создава најубава атмосфера.“
Изберете ламба со топол сјај што ќе биде и практична и декоративна. Малите ноќни светилки се одличен начин да внесете чувство на сигурност и нежност во просторот.
5. Додадете личен печат
„Собата треба да одразува дел од вас,“ вели Јоана.
Тоа може да биде рамка со првата фотографија, ѕиден постер со инспиративна порака или омилената мекана играчка која ќе стане првиот пријател на вашето бебе.
Деталите ја прават собата попријатна и удобна.
Со внимателен избор на материјали и производи, можете да создадете бебешка соба која е топла, безбедна и естетски усогласена.
Ако сакате инспирација или професионална помош околу дизајнот, тимот на Структурал Дизајн секогаш е тука за да ви помогне да го создадете совршениот простор за вашето бебе.
