Разговаравме со Марија Кочевска од Реформер Студио 60 за тоа како пилатесот на реформер може да помогне во текот на бременоста — да ја зајакне телесната стабилност, да го намали притисокот во грбот и да донесе чувство на смиреност. Таа сподели практични совети и одговори на најчесто поставуваните прашања од идните мајки.
Дали е безбедно да се вежба Пилатес на реформер за време на бременоста?
Марија: Да, кога се изведува под надзор на сертифициран инструктор и со индивидуален пристап. Реформер Пилатес нуди контролирани движења, поддршка и прилагодена отпорност што овозможува безбедно зајакнување на телото без преголем притисок на зглобовите или стомачните мускули.
Кои се најголемите бенефити од Пилатес за трудници?
Марија: Пилатес помага во стабилизација на карлицата, подобрување на држењето, олеснување на болките во грбот и одржување на силно јадро кое ја поддржува матката. Дополнително, ги подготвува мускулите за породување и ја олеснува циркулацијата, што е клучно за општото чувство на леснотија и рамнотежа.
Во кој триместар е најдобро да се започне?
Марија: Идеално е да се започне во првиот или вториот триместар, откако гинекологот ќе даде одобрение. Но, и жените кои претходно не вежбале можат да започнат со нежни, прилагодени вежби во било кој период – важна е контролата, не интензитетот.
Кои движења треба да се избегнуваат?
Марија: Се избегнуваат сите вежби што предизвикуваат притисок врз стомакот, лежечки позиции на грб во подоцнежни месеци и прекумерно истегнување или наведнување на главата надолу испод линијата на папокот во положба со лицето према подот . Фокусот е на стабилност, правилно дишење и свесна контрола на движењата.
Како се чувствуваат трудниците по тренинг?
Марија: Најчесто – лесно, растеретено и поурамнотежено. Многу трудници велат дека Пилатесот им го враќа чувството на контрола над сопственото тело и им помага да ја поминат бременоста со повеќе енергија и помалку болка.
Дали Пилатес може да помогне и по породувањето?
Марија: Апсолутно. Контролата и свесноста стекнати во текот на бременоста се од огромна помош во постпородилниот период. Вежбите го враќаат тонот на стомачните мускули, ја стабилизираат карлицата и помагаат при подобрување на држењето, особено поради носењето на бебето и доењето. Секако, со дозвола од докторот и постепено враќање во тренинг.
Што би им порачале на трудниците кои се двоумат дали да започнат?
Марија: Да ѝ веруваат на сопствената интуиција и да го слушаат телото. Пилатесот е пракса на свесно движење, дишење и поврзување со себе и со бебето. Секој тренинг може да биде благ, поддржувачки и прилагоден, а резултатот е чувство на леснотија, сила и мир.
Доколку сте бремени и сакате безбедна физичка активност под надзор, во Реформер студио 60 ќе најдете обучени инструктори кои знаат како да го приспособат секое вежбање на вашите потреби.
